ინფორმაცია საქართველოში შემომსვლელი ტურისტებისთვის სავალდებულო დაზღვევის შესახებ

„ტურიზმის შესახებ“ საქართველოს კანონის თანახმად,  2026 წლის 01 იანვრიდან საქართველოში შემომსვლელი ყველა ტურისტისთვის სავალდებულოა ჯანმრთელობისა და უბედური შემთხვევის დაზღვევის მოქმედი პოლისის ფლობა.

 

საქართველოში შემომსვლელმა ნებისმიერმა ტურისტმა უნდა წარადგინოს მოქმედი სადაზღვევო პოლისი მატერიალური ან ელექტრონული ფორმით, რომელიც შედგენილი იქნება ქართულ ან ინგლისურ ენაზე.

 

სადაზღვევო პოლისი შეიძლება გაცემული იყოს, როგორც ქართული, ასევე უცხოური სადაზღვევო კომპანიის მიერ და სადაზღვევო თანხა უნდა შეადგენდეს არანაკლებ 30 000 ლარს.

 

დაზღვევის პოლისი უნდა შეიცავდეს შემდეგ სავალდებულო ინფორმაციას:

 

• დაზღვევის ხელშეკრულების მხარეები;

• დაფარული ტერიტორია;

• დაზღვევის საგანი;

• სადაზღვევო პერიოდის დაწყებისა და დასრულების დრო;

• სადაზღვევო რისკები;

• სადაზღვევო თანხის ოდენობა (ლიმიტები);

• სადაზღვევო შესატანის მოცულობა, მისი გადახდის ადგილი და ვადა.

 

დაზღვევა ძალაში უნდა იყოს ტურისტის საქართველოში შემოსვლიდან ქვეყნის დატოვებამდე სრული პერიოდის განმავლობაში.

 

სავალდებულო დაზღვევის მოთხოვნა არ გავრცელდება:

 

• დიპლომატიური ან სპეციალური ვიზის მფლობელ პირებზე;

• დიპლომატიური, ოფიციალური, სამსახურებრივი ან სპეციალური პასპორტის მფლობელ პირებზე;

• საქართველოში დიპლომატიური წარმომადგენლობების, საკონსულო დაწესებულებების, საერთაშორისო ორგანიზაციების წარმომადგენლობების, აგრეთვე, მათთან გათანაბრებული წარმომადგენლობების აკრედიტებულ თანამშრომლებზე, აგრეთვე, თანამშრომელთა იმ ოჯახის წევრებზე, რომლებსაც აქვთ აკრედიტაცია;

• პირებზე, რომელთა საქართველოში შემოსვლა გათვალისწინებულია საქართველოს საერთაშორისო შეთანხმებებით ან ხელშეკრულებებით;

• საერთაშორისო საავტომობილო სატვირთო გადაზიდვებსა და სამგზავრო გადაყვანებში ჩართულ მძღოლებზე.